როგორც დღეს, თბილისის ახლადარჩეულმა მერმა კახა კალაძემ განაცხადა,
უახლოეს პერიოდში მეტროსადგური "გურამიშვილი" ორი დღით დაიკეტება.
ამის მიზეზი მიმდინარე სარეაბილიტაციო სამუშაოებია, რომელიც
უმოკლეს დროში უნდა დასრულდეს.
კალაძეს თქმით, აღნიშნულის თაობაზე მოსახლეობა წინასწარ იქნება
ინფორმირებული.
დედაქალაქის მერმა, თავისი გუნდის წევრებთან და მედიის
წარმომადგენლებთან ერთად, თბილისის მეტროპოლიტენით იმგზავრა. ის
მეტროსადგურებში არსებულ მდგომარეობას კიდევ ერთხელ გაეცნო და მეტროს
მოდერნიზაციის პროექტზე ისაუბრა.
როგორც კალაძემ ჟურნალისტებს განუცხადა, ძალიან მნიშვნელოვანია მეტროს
თითოეული სადგურის რეაბილიტაცია და ამისთვის ყველა მიმართულებით
აქტიური მუშაობა დაიწყება.
„საუბარია სამ მიმართულებაზე- მეტროსადგურების რეაბილიტაციაზე,
ვაგონების განახლებაზე ან შეიძლება ვიფიქროთ ახალი, თანამედროვე ტიპის
ვაგონების შემოყვანაზე, რომელსაც ექნება 50-წლიანი გარანტია; ასევე
აუცილებელია კომუნიკაციების - ელექტროგაყვანილობა, საჰაერო, სახანძრო
და წყალსაქაჩი სისტემების მოწესრიგება“, - განმარტა თბილისის არჩეულმა
მერმა.
კახა კალაძის თქმით, მნიშვნელოვანი იქნება მეტროპოლიტენის ვიზუალური
მხარეც- ერთიანი დიზაინის შემუშავებაზე მუშაობა დაიწყება მთლიანად
საზოგადოებრივი ტრანსპორტის მიმართულებით.
მასალის გამოყენების პირობები