საქართველოს მთავრობის ადმინისტრაციაში, დღეს, 15 აპრილს გამართულ შეხვედრაზე უცხოური გავლენის გამჭვირვალობის შესახებ” კანონპროექტი განიხილეს.

ინფორმაციას, აღნიშნულთან დაკავშირებით, საქართველოს მთავრობა ავრცელებს.

“საქართველოს პრემიერ-მინისტრი ირაკლი კობახიძე საქართველოში აშშ-ის საგანგებო და სრულუფლებიან ელჩს, რობინ დანიგანს; ევროკავშირის ელჩს, პაველ ჰერჩინსკის და დიდი ბრიტანეთისა და ჩრდილოეთ ირლანდიის გაერთიანებული სამეფოს საგანგებო და სრულუფლებიან ელჩს, მარკ კლეიტონს შეხვდა.

მთავრობის ადმინისტრაციაში გამართულ შეხვედრაზე „უცხოური გავლენის გამჭვირვალობის შესახებ“ კანონპროექტი განიხილეს. პრემიერ-მინისტრმა აღნიშნა, რომ კანონი სრულად შეესაბამება ყველა ძირითად სამართლებრივ პრინციპს და ის ემსახურება ერთადერთ მიზანს − არასამთავრობო ორგანიზაციებისა და შესაბამისი მედიასაშუალებების ფინანსების ყოველწლიურ გასაჯაროებას.

ირაკლი კობახიძის თქმით, მაშინ, როდესაც ხელისუფლება თავად აჩვენებს გამჭვირვალობის მაგალითს და ქვეყნდება მთავრობის ყველა გადაწყვეტილება თუ სამართლებრივი აქტი, გაუგებარია, რატომ არის მიუღებელი არასამთავრობო ორგანიზაციებისთვის გამჭვირვალობის მინიმალური სტანდარტის დაკმაყოფილება.

მთავრობის მეთაურმა კიდევ ერთხელ დაადასტურა ხელისუფლების სრული მზადყოფნა კანონთან დაკავშირებით ღია დისკუსიისთვის, რათა ქართულ საზოგადოებას და საქართველოს მეგობრებს არცერთი კითხვის ნიშანი არ დარჩეთ,” - აღნიშნულია ინფორმაციაში.

აღსანიშნავია, რომ მთავრობის ადმინისტრაციაში, შეხვედრის დაწყებამდე, ჟურნალისტებს განუცხადეს, რომ შეხვედრა რამდენიმე დღის წინ დაიგეგმა და იგი არ უკავშირდებოდა  პრემიერ-მინისტრის, ირაკლი კობახიძის მიერ 14 აპრილის ინიციატივას “უცხოური გავლენის გამჭვირვალობის შესახებ” კანონპროექტთან დაკავშირებით.