თელავის საოლქო საარჩევნო კომისიამ ცენტრალური საარჩევნო კომისიის რეკომენდაცია გაითვალისწინა და ხუთის ნაცვლად, შვიდი საარჩევნო უბნის შედეგებს გადათვლის ხელახლა.
ამის შესახებ ჩვენთან საუბარში კომისიის თავმჯდომარე რევაზ გაიპარაშვილმა აღნიშნა.

-"უბნები, რომლებიც ხელახლა უნდა გადაითვალოს, ლოტოტრონის მეშვეობით გამოვავლინეთ. გავითვალისწინეთ ცესკოს რეკომენდაცია და ხელახლა შვიდი უბანი გადაითვლება. გადათვლის პროცესი დღეს,  5 საათზე, მეორე სკოლის სპორტულ დარბაზში დაიწყება,"- აღნიშნა გაიპარაშვილმა.

ცნობისთვის, ცესკოს თავმჯდომარე გიორგი კალანდარიშვილმა საოლქო საარჩევნო კომისიებს ინიციატივითა და რეკომენდაციით მიმართა,  სავალდებულო 5 უბნის ნაცვლად, 7-7 საარჩევნო უბნის შედეგი გადაეთვალათ.

როგორც კალანდარიშვილმა აღნიშნა, საარჩევნო რეფორმის საფუძველზე განხორციელებულმა გადათვლის პროცედურებმა არჩევნების პირველ ტურზე აჩვენა, რომ აღნიშნულმა მნიშვნელოვნად შეუწყო ხელი პროცესის გამჭვირვალობას.