განათლებისა და მეცნიერების მინისტრ ალექსანდრე ჯეჯელავას განცხადებით,  ოპტიმიზაციის შედეგად, 73 საგანმანათლებლო რესურსცენტრის 50%-ს იურისტი აღარ ეყოლება.

ამის შესახებ მან ტელეკომპანია "პალიტრას" ეთერში ისაუბრა.  მინისტრის ინფორმაციით, დარჩენილ კადრებს ხელფასიც და სამუშაოც გაეზრდება.

"მთავარი აქცენტი გადატანილია, ნაკლები რესურსით საქმის უკეთ გაკეთებაზე, მაგალითად შემიძლია მოვიყვანო, რომ თითეულ რესურსცენტრში, რაიონულ განყოფილებაში ასეთი გვაქვს 73, 73-ისვე ჰყავდა იურისტი. იურისტებთან და რესურსცენტრებთან მსჯელობის შედეგად ჩავთვალეთ, რომ არ იყო აუცილებელი. სრულად დატვირთული არ იყვნენ და ყოველ რესურსცენტრს თითო იურისტი არ სჭირდება. ამიტომ გადავწყვიტეთ, რომ შევეცადოთ ჯამური რაოდენობა დაახლოებით გავანახევროთ. საბოლოოდ გამოდის, რომ 73 იურისტიდან 36-37 გავუშვებთ."

speqtri.ge დაინტერესდა, რა კრიტერიუმებით შეირჩევა ის რესურსცენტრები, სადაც იურისტის შტატი გაუქმდება. თუმცა განათლებისა და მეცნიერების სამინისტროში ამ კითხვაზე პასუხი ვერ გაგვცეს.

მინისტრისვე ცნობით, ოპტიმიზაცია შეეხო აუდიტის სამსახურის რეგიონულ წარმომადგენლებს.

-"ზოგიერთ შემთხვევაში ვაკეთბთ ოპტიმიზაციას მომსახურების შესყიდვის მეთოდით, მაგალითად გვყავს აიტი სპეციალისტები ძალიან ბევრი, რომელიც ყველას ემსახურება. თუმცა ისეთ ადგილებში, სადაც აიტი კომპანიები მუშაობენ ჯობია, რომ მომსახურება შევისყიდოთ და არა თანამშრომლები გვყავდეს შტატში"- განაცხადა ჯეჯელავამ.